Një laptop ka marrë flakë gjatë një fluturimi të kompanisë American Airlines, duke shkaktuar panik në kabinën e avionit dhe duke lënë të dyshuar pesë pasagjerë me djegie.
Ngjarja ndodhi të premten në mbrëmje, gjatë fluturimit AA2398, i cili ishte nisur nga Atlanta, Georgia, drejt Dallasit, Texas, me më shumë se 130 pasagjerë në bord, shkruan New York Post
Sipas komunikimeve të pilotit me kontrollin ajror, të siguruara nga CBS News, ekuipazhi raportoi një “zjarr në kabinën e pasme të avionit”.
“Besoj se kemi rreth katër ose pesë pasagjerë që janë djegur nga laptopi”, dëgjohet të ketë thënë piloti. Ai bëri të ditur gjithashtu se pajisja ndodhej rreth mesit të avionit.
Anëtarët e ekuipazhit të kabinës reaguan menjëherë dhe arritën ta izolonin pajisjen, duke përdorur një çantë të posaçme për izolimin termik të baterive.
Avioni u ul në mënyrë të sigurt në Dallas-Fort Worth International Airport rreth orës 18:55, ku ekipet e emergjencës prisnin për të kontrolluar pasagjerët. Sipas raportimeve, një person kishte nevojë për trajtim mjekësor.
American Airlines konfirmoi se avioni u ul pa probleme pas raportimeve për tym që vinte nga pajisja e një pasagjeri, ndërsa vlerësoi reagimin e ekuipazhit për “profesionalizmin dhe reagimin e shpejtë” në izolimin e pajisjes.
Administrata Federale e Aviacionit në SHBA (FAA) konfirmoi se ekuipazhi kishte raportuar një zjarr të baterisë së laptopit dhe bëri të ditur se incidenti është duke u hetuar.
