Bashkimi Evropian ka njoftuar emërimin e Dirk Schuebel si ambasadorin e ri të BE-së në Kosovë.
Sipas njoftimit të Zyrës së Bashkimit Evropian në Kosovë, Schuebel do ta marrë zyrtarisht detyrën më 1 shtator, duke vazhduar angazhimin e BE-së në mbështetje të procesit të integrimit evropian të Kosovës
Tani Bashkimi Evropian ka publikuar edhe CV-in e ambasadorit të ri Dirk Schuebel.
Postimi i plotë:
Dirk Schuebel është shtetas gjerman dhe aktualisht mban pozitën e Shefit të Divizionit për Rusinë në Shërbimin Evropian për Veprim të Jashtëm (EEAS).
Nga shtatori 2022 deri në korrik 2024, ai ka shërbyer si i Dërguari Special i Bashkimit Evropian për Partneritetin Lindor.
Para kësaj detyre, ai ishte Shef i Delegacionit të Bashkimit Evropian në Bjellorusi për tre vjet, nga shtatori 2019 deri në vitin 2022.
Nga viti 2018 deri në vitin 2019, Schübel drejtoi Divizionin për Rusinë në EEAS, ndërsa më herët, nga 2013 deri në 2018, ishte Shef i Divizionit për Marrëdhëniet Dypalëshe të Partneritetit Lindor, duke u marrë me marrëdhëniet e BE-së me Ukrainën, Bjellorusinë, Moldavinë, Gjeorgjinë, Azerbajxhanin dhe Armeninë.
Nga 2009 deri në 2013, ai shërbeu si Ambasador dhe Shef i Delegacionit të Bashkimit Evropian në Republikën e Moldavisë.
Më herët, nga fillimi i vitit 2006 deri në 2009, ai ishte Shef i Seksionit Politik, për Shtyp dhe Informim në Delegacionin e BE-së në Kiev, përgjegjës për Ukrainën dhe Bjellorusinë.
Schuebel ka mbajtur gjithashtu një sërë pozitash në Komisionin Evropian dhe në Ministrinë e Punëve të Jashtme të Gjermanisë, që nga viti 1993. Në institucionet evropiane ai ka punuar në Drejtoritë e Përgjithshme për Energji dhe Transport, Zgjerim dhe Tregti. Në fillim të karrierës së tij diplomatike në Gjermani, ai ishte i specializuar në marrëdhëniet ekonomike ndërkombëtare, tregtinë e jashtme dhe promovimin e saj.
Në aspektin personal, është i martuar dhe ka një vajzë.
Kush është ambasadori i ri i BE-së në Kosovë?
Dirk Schuebel është një diplomat gjerman me mbi tri dekada përvojë në diplomacinë evropiane. Gjatë karrierës së tij ai ka shërbyer në poste të rëndësishme në Moldavi, Ukrainë, Bjellorusi dhe në strukturat qendrore të Shërbimit Evropian për Veprim të Jashtëm, duke u fokusuar kryesisht në Evropën Lindore, Rusinë dhe Partneritetin Lindor. Përvoja e tij e gjatë në rajon konsiderohet si një nga arsyet kryesore të emërimit të tij në Kosovë.
