Kurti takon Walkerin, nesër marrin pjesë në ceremoninë përkujtimore të Masakrës së Reçakut

Në prag të shënimit të 27-vjetorit të Masakrës së Reçakut, kryeministri në detyrë, Albin Kurti, ka pritur në një takim ambasadorin William Walker, ish-shef i Misionit Verifikues të OSBE-së, i shoqëruar nga bashkëshortja e tij dhe bashkëpunëtorë.

Siç njofton Kryeministria, gjatë bisedës, Kurti u shpreh se është gjithmonë i lumtur ta mirëpresë dhe ta takojë ambasadorin Walker, duke shprehur mirënjohjen e tij të thellë “për rolin historik” që ai ka pasur për popullin e Kosovës në ekspozimin e krimeve gjenocidale të Serbisë, për miqësinë e çmuar që vazhdon dhe për angazhimin e tij të pareshtur në shërbim të së vërtetës dhe drejtësisë.

Në takim thuhet se është bashkëbiseduar edhe për zhvillimet e fundit në vend, si dhe për përgatitjet për ceremoninë përkujtimore të Masakrës së Reçakut, e cila do të mbahet nesër në komunën e Shtimes, ku të dy do të marrin pjesë.

Sipas njoftimit, ambasadori Walker falënderoi për takimin dhe bisedën, “dhe e uroi kryeministrin Kurti për rezultatin zgjedhor dhe fitoren në zgjedhjet e 28 dhjetorit 2025”.