Kryeministri në detyrë, Albin Kurti, ka përkujtuar Dervish Rozhajën, në 30-vjetorin e vdekjes së tij.
Kurti ka vlerësuar kontributin e Rozhajës në shkencë, arsim dhe jetën publike, duke theksuar se ai ishte rektori i parë i Universitetit të Prishtinës dhe një nga figurat e rëndësishme të Akademisë së Shkencave dhe Arteve të Kosovës.
Postimi i plotë:
30 vite më pas nga dita kur ai vdiq, më 23 gusht të vitit 1996, e kujtojmë Dervish Rozhajën, njërin ndër personalitetet më të shquara të shkencës, arsimit dhe jetës publike në historinë e Kosovës.
Pas Luftës së Dytë Botërore, Universiteti i Prishtinës ishte institucioni më i rëndësishëm për të gjithë shqiptarët e mbetur jashtë Shqipërisë. E biologu dhe fiziologu Dervish Rozhaja, ishte profesor universitar dhe rektori i parë i Universitetit të Prishtinës, anëtar dhe më pas nënkryetar dhe kryetar i Akademisë së Shkencave dhe Arteve të Kosovës.
Dervish Rozhaja ka lindur në vitin 1934 në Pejë, ku edhe e kreu shkollimin fillor. Pas mbarimit të shkollës së mesme në Gjakovë më 1949, ai studioi për biologji në Universitetin e Beogradit ku u diplomua më 1954. Katër vite më vonë, ai doktoroi kur ishte ende vetëm 24 vjeçar, duke u bërë doktori më i ri në moshë në tërë ish Jugosllavinë. Që në vitet 1954/’55, ai kishte dhënë mësim si profesor biologjie në Shkollën Normale të Prishtinës, kurse karrierën universitare, Rozhaja e filloi në vitin 1960, duke ligjëruar në Fakultetin e Shkencave Natyrore të Prishtinës.
Dhjetë vite më pas, kur u themelua Universiteti i Prishtinës, në mbledhjen e parë që i nxori organet drejtuese të tij, më 13 shkurt 1970, Dervish Rozhaja u zgjodh rektori i parë i Universitetit të Prishtinës. Dy ditë më pas, më 15 shkurt 1970, në mbledhjen solemne themeltare të Universitetit të Prishtinës, e mbajtur në Kuvendin e Kosovës, rektori Rozhaja kishte mbajtur një fjalim ku ndër të tjera kishte thënë:
“Zhvillimi i fuqishëm i shkencës sjell ndryshime përkatëse në koncepcionin dhe pozicionin e saj në shoqëri. Në vend të shkencës si aktivitet i ndarë nga jeta, sot e kemi depërtimin e saj në të gjitha poret e jetës. Në vend të shkencës me të cilën merret një numër i kufizuar personalitetesh, po përhapet gjithnjë e më shumë puna shkencore si veprimtari e gjerë shoqërore. Tani po zhvillohen dy procese komparative, të njëkohshme dhe konvergjente: shoqëria po e përvetëson gjithnjë e më shumë shkencën si faktor kapital i zhvillimit dhe progresit, e shkenca po kalon gjithnjë e më shumë në duart e shoqërisë.”
Në kulmin e viteve të Luftës së Ftohtë, Dervish Rozhaja pati fatin të specializohej në dy polet e kohës: më 1962/’63 në Institutin Fiziologjik të Akademisë së Shkencave të BRSS-së në Leningrad dhe më 1973/’74 në Institutin Neurologjik të Fakultetit të Mjekësisë të Universitetit të Kalifornisë në Los Anxhelos të ShBA-ve.
Dervish Rozhaja vdiq në Prishtinë më 23 gusht 1996, në moshën 62 vjeçare. Ai do të kujtohet për kontributin e tij të gjerë shkencor, profesional dhe institucional në jetën shkencore akademike por edhe në atë publike në Kosovë. U kujtoftë gjithmonë mes nderimesh dhe mirënjohjesh, si një profil shembullor i shkencëtarit, profesorit dhe akademikut që me ndërgjegje u përgjigjet kërkesave të kohës së tij.
