Kryeministri në detyrë, Albin Kurti bashkë me presidenten Vjosa Osmani dhe Kryetarin e Kuvendit, Dimal Basha, në Ditën Ndërkombëtare Përkujtimore të Holokaustit, vendosën kurorë me lule në përkujtim të të gjitha viktimave që u vranë me plumba dhe gaz, që u dogjën në krematoriume, apo vdiqën nga kushtet e tmerrshme nëpër kampet e përqendrimit dhe nga aksionet e nazistëve gjatë viteve të Luftës së Dytë Botërore.
Përmes një postimi në Facebook, Kurti thotë se këto krime mizore dhe vuajtje çnjerëzore i dhanë njohje ndërkombëtare konceptit të gjenocidit, përmes së cilit “ne sot i emërtojmë aktet e vrasjeve dhe shkatërrimet e qëllimshme, të pjesshme apo të tërësishme, të një komuniteti të caktuar etnik, kombëtar, fetar apo racor”.