Kryetari i Komunës së Lipjanit, Imri Ahmeti, ka reaguar publikisht pas publikimit të pamjeve dhe informacioneve shtesë lidhur me rastin tragjik të ndarjes nga jeta të të riut Agon Zejnullahu.
Në deklaratën e tij, Kryetari Ahmeti ka shprehur ngushëllimet më të sinqerta për familjen Zejnullahu, shokët dhe të afërmit e Agonit, duke theksuar se humbja e një të riu është një dhimbje e madhe për çdo familje dhe për gjithë shoqërinë.
“Ndërkohë që ende nuk kemi një version zyrtar nga organet kompetente, kërkojmë nga institucionet përgjegjëse që të sqarojnë rrethanat e këtij rasti sa më parë dhe në mënyrë të plotë. Mbi të gjitha, siguria dhe jeta e qytetarëve duhet të jenë prioritet i institucioneve tona, në çdo kohë dhe në çdo rrethanë,” ka deklaruar Ahmeti.
Ai ka kërkuar që hetimet të zhvillohen me transparencë dhe përgjegjësi, duke theksuar se qytetarët kanë të drejtë të dinë të vërtetën dhe të ndihen të sigurt në vendin e tyre.
