Kryetari i Aleancës për Ardhmërinë e Kosovës, Ardian Gjini, ka kritikuar ashpër qeverisjen aktuale për politikat në sektorin energjetik, duke e akuzuar atë për dështim në sigurimin e prodhimit vendor të energjisë.
Në një reagim të tij, Gjini ka rikthyer në vëmendje projektet energjetike “Kosova C” dhe atë me kompaninë “ContourGlobal”, duke thënë se, sipas tij, Aleanca ka qenë e vetmja forcë politike që ka reaguar fuqishëm ndaj anulimit të tyre.
“Kur është anuluar projekti energjetik ‘Kosova C’, vetëm Aleanca ka reaguar shumë fuqishëm. Të tjerët e kanë mbyllur gojën, kush e di se pse?!”, ka shkruar Gjini.
Ai ka thënë se e njëjta situatë është përsëritur edhe pas prishjes së projektit energjetik me “ContourGlobal”.
“Kur u prish projekti energjetik me ‘ContourGlobal’, përsëri reagoi vetëm Aleanca”, ka deklaruar ai.
Sipas Gjinit, qeveria ka përdorur, siç i quan ai, “arsyetime nga më bizaret” për të mos zhvilluar kapacitetet e reja prodhuese të energjisë në Kosovë.
Ai ka ngritur kritika edhe për mënyrën se si po menaxhohet qymyri dhe energjia elektrike, duke pretenduar se Kosova po shet qymyr dhe më pas po detyrohet të blejë energji me çmime shumë më të larta.
