Komuna e Prishtinës ka njoftuar se nesër do të zhvillojë një aksion të përbashkët për të luftuar tregtimin ilegal në tregun e automjeteve dhe hapësirat përreth tij.
Sipas komunikatës zyrtare, nga ora 05:00, ekipet e Inspektoratit të Kryeqytetit, në koordinim me Policinë e Kosovës dhe inspektorët e AVUK-ut, do të ndërmarrin veprime direkte në terren për zbatimin e ligjit.
Qëllimi i këtij aksioni është të ndërmerren masa ndaj shitësve që operojnë në mënyrë të paautorizuar, si dhe ndaj çdo aktiviteti tjetër që shkel rregulloret dhe legjislacionin në fuqi, duke përfshirë tregtimin e paautorizuar të shpezëve dhe kafshëve.