Koci: Nesër do të jem në ZRRE për të kërkuar sqarime lidhur me kërkesën për shtrenjtimin e rrymës

Avokati Arianit Koci ka falënderuar qytetarët për reagimet e shumta ndaj thirrjes për protestë kundër rritjes së tarifave të energjisë elektrike.

Ai theksoi se mbi 22 mijë reagime dhe gati 1 milion vizita janë shfaqur deri tani, duke treguar pakënaqësinë e madhe të qytetarëve.

Koci do të vizitojë Zyrën e Rregullatorit për Energji (ZRRE) për të kërkuar sqarime mbi arsyet e shtrenjtimit dhe pasojat që do të ketë kjo rritje për familjet me të ardhura të ulëta.

“Faleminderit për reagimin e madh pas thirrjes për protestë kundër shtrenjtimit të rrymës, në postimin tim të fundit.

Mbi 22 mijë reagime deri më tash, dhe pak më pak se 1 milion vizita.

Komente, shpërndarje, mesazhe çdo minutë.

Kjo tregon se pakënaqësia është e madhe dhe se qytetarët nuk pranojnë të heshtin.

Ky shqetësim ka një arsye konkrete: rritjen e tarifave të energjisë elektrike.

Shtrenjtimi i energjisë i shtyn mijëra familje drejt fukarallëkut.

Për shumë prej tyre, kjo është çështje e mbijetesës.

Sidoqoftë, tarifat janë ende në shqyrtim në Zyrën e Rregullatorit për Energji.

Propozimi është dorëzuar në fund të janarit, i paraqitur si aplikim financiar me gjuhë teknike.

Për shumicën e qytetarëve këto dokumente janë të vështira për t’u kuptuar, por pasoja është e drejtpërdrejtë: pagesë më e lartë për të njëjtën sasi të energjisë së konsumuar.

Për këtë arsye, nesër do të jem në ZRRE për të kërkuar sqarime:

– Pse po kërkohet kjo rritje?

– Sa nga kjo barrë vjen prej importit të shtrenjtë të energjisë elektrike, e sa prej humbjeve në rrjet, importeve të vonuara, keqmenaxhimit në prodhim dhe keqpërdorimeve eventuale gjatë blerjes së rrymës?

– Kush mban përgjegjësi nëse kjo barrë bie mbi familjet me të ardhura të ulëta?

Propozimi për shtrenjtimin e rrymës është dorëzuar zyrtarisht dhe procesi është në zhvillim.

Pikërisht për këtë arsye reagimi duhet të ndodhë tani, para se të merret ai vendim.

Shtrenjtimi nuk kalon.”, shkroi Koci.