KMDLNJ tregon se kur mund të shpallet vendimi për ish-krerët e UÇK-së

Këshilli për Mbrojtjen e të Drejtave dhe Lirive të Njeriut (KMDLNJ) ka reaguar ashpër ndaj Dhomave të Specializuara në Hagë, duke i cilësuar ato si një “gjykatë speciale raciste” dhe duke pretenduar se themelimi i saj ishte bërë nën presion dhe kërcënime ndërkombëtare.

Sipas KMDLNJ-së, Gjykata Speciale ka devijuar nga qëllimi fillestar për të siguruar drejtësi për viktimat dhe përgjegjësi për shkeljet e së drejtës humanitare, duke vepruar, sipas tyre, mbi baza etnike dhe duke ndjekur penalisht vetëm shqiptarët.

Në reagim thuhet se gjykata ka shkelur parimet e transparencës, prezumimit të pafajësisë dhe të drejtën për gjykim brenda një afati të arsyeshëm, ndërsa kritikohet edhe refuzimi i vazhdueshëm i kërkesave për masa më të lehta ndaj të paraburgosurve pas përfundimit të paraqitjes së provave dhe fjalëve përmbyllëse.

KMDLNJ-ja vlerëson se moszëvendësimi i paraburgimit me masa alternative për të akuzuarit pas përfundimit të procesit gjyqësor përbën, sipas saj, “prejudikim flagrant” të vendimit përfundimtar.

Organizata kritikon gjithashtu institucionet e Kosovës dhe aktorët politikë për, siç thotë, mungesë reagimi ndaj veprimeve të Gjykatës Speciale, duke pretenduar se ka mbetur e vetmuar në kundërshtimin e asaj që e quan arbitraritet politik dhe etnik.

Në fund të reagimit, KMDLNJ-ja vlerëson se periudha më e mundshme për shpalljen e vendimit në rastin ndaj ish-krerëve të UÇK-së është mes muajve shtator dhe nëntor të vitit 2026.