Ushtarët e caktuar në Komandën Rajonale-Lindje (RC-E), pjesë e misionit të udhëhequr nga NATO, KFOR, zhvilluan një stërvitje për reagim ndaj rrëzimit të një avioni pranë Kampit Bondsteel, duke forcuar koordinimin shumëkombësh mjekësor dhe kapacitetet e reagimit të shpejtë në të gjithë zonën e operimit.
Në njoftim thuhet se stërvitja mblodhi ekuipazhe ajrore, personel mjekësor të fluturimeve dhe pjesëmarrës në role të ndryshme për të ushtruar procedurat e triazhimit, trajtimit dhe evakuimit të të lënduarve, duke përmirësuar njëkohësisht ndërveprueshmërinë ndërmjet njësive të KFOR-it.
Njoftimi i plotë:
Ushtarët e caktuar në Komandën Rajonale-Lindje (Regional Command-East – RC-E), pjesë e misionit të KFOR-it të udhëhequr nga NATO, zhvilluan një stërvitje për reagim ndaj rrëzimit të një mjeti ajror pranë Camp Bondsteel, duke forcuar koordinimin shumëkombësh mjekësor dhe aftësitë për reagim të shpejtë në të gjithë zonën e operacioneve.
Stërvitja mblodhi ekuipazhe ajrore, mjekë të fluturimit dhe pjesëmarrës që luanin rolin e të lënduarve, për të ushtruar procedurat e triazhimit, trajtimit dhe evakuimit të të plagosurve, si dhe për të rritur ndërveprueshmërinë ndërmjet njësive të KFOR-it. Kjo ndihmon që personeli të mbetet i gatshëm për t’iu përgjigjur me shpejtësi dhe efektivitet situatave emergjente.
Këto stërvitje u mundësojnë pjesëtarëve të KFOR-it të ruajnë ndërgjegjësimin për situatën, gatishmërinë operacionale dhe aftësitë e nevojshme për të kontribuar në një mjedis të sigurt dhe të qetë për të gjithë njerëzit që jetojnë në Kosovë.
KFOR-i vazhdon të zbatojë mandatin e tij, të bazuar në Rezolutën 1244 të Këshillit të Sigurimit të Kombeve të Bashkuara të vitit 1999, për të kontribuar në një mjedis të sigurt dhe të qetë për të gjithë njerëzit që jetojnë në Kosovë, si dhe për të garantuar lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me rolet e tyre përkatëse si reagues ndaj çështjeve të sigurisë.
