Avokati i njohur Besnik Berisha, i cili përfaqëson kapitenin e Policisë së Kosovës, Besart Ahmeti, ka thyer heshtjen pas disa ditësh përplasjeje publike rreth incidentit në të cilin është përfshirë klienti i tij.
Berisha ka dalë me një reagim të gjatë, duke paralajmëruar se ajo që është thënë deri më tani në publik për Ahmetin, sipas mbrojtjes, do të duhet të përballet me diçka shumë më të fuqishme se deklaratat e palëve: pamjet e kamerave, materialet audiovizuale dhe dëshmitarët e ngjarjes.
“Heshtja ka kuptim vetëm për aq kohë sa nuk keqpërdoret për t’i dhënë zë gënjeshtrës”, është fjalia me të cilën avokati Besnik R. Berisha e nis reagimin.
Sipas tij, mbrojtja ka heshtur edhe kur kapiteni Ahmeti, nga person që kishte denoncuar se ishte sulmuar, nisi të portretizohej publikisht si sulmues.
“Për disa ditë kemi zgjedhur të heshtim, edhe atëherë kur për Kapitenin Besart Ahmeti është thënë pothuajse gjithçka, edhe atëherë kur nga i sulmuar është portretizuar si sulmues, nga denoncues si i denoncuar”, shkruan Berisha.
Avokati Berisha thotë se vendimi për të mos reaguar menjëherë nuk kishte të bënte me mungesën e argumenteve apo të provave.
Përkundrazi.
Ai thotë se mbrojtja kishte vendosur që të mos e zhvillonte çështjen përmes mediave, duke besuar se një ngjarje që tashmë është objekt hetimi duhet të sqarohet përmes institucioneve.
Berisha zbulon se ka qenë personalisht përkrah kapitenit Ahmeti gjatë paraqitjes së tij në Inspektoratin Policor të Kosovës, ku klienti i tij ka dhënë versionin e plotë për incidentin dhe është përballur me pretendimet e ngritura ndaj tij.
Sipas avokatit, mundësia për të folur publikisht ka ekzistuar që atë ditë, por mbrojtja kishte vendosur që të mos e kthente rastin në “garë deklaratash”.
“Nuk kemi dashur që betejën për ligj dhe drejtësi ta zhvillojmë në media.”
Kamerat mund të bëhen dëshmitari kryesor i incidentit
Pikërisht këtu reagimi i Berishës merr peshën më të madhe.
Sipas tij, për atë që ndodhi ekzistojnë prova që nuk varen nga versioni i asnjërës palë.
Ka dëshmitarë. Ka kamera sigurie. Ka materiale audiovizuale.
Berisha pretendon se përmes tyre mund të rindërtohet dinamika e incidentit, të dëgjohet komunikimi dhe të verifikohet sjellja e personave të përfshirë.
Për avokatin e Ahmetit, pikërisht këto prova duhet ta kenë fjalën kryesore.
“Në vend se të numërohen deklaratat e dhëna pas ngjarjes, do të ishte shumë më e ndershme që secili të presë se çfarë tregojnë provat për atë që ka ndodhur në të vërtetë.”
“Besart Ahmeti ishte me bashkëshorten dhe dy fëmijët”
Berisha rikujton një rrethanë që, sipas tij, është esenciale për ta kuptuar incidentin.
Kapiteni Ahmeti atë ditë nuk ishte në detyrë, nuk ishte në uniformë dhe nuk po ushtronte autoritetin e tij policor.
Ai ndodhej në qendrën tregtare si qytetar, bashkë me bashkëshorten dhe dy fëmijët.
Mbrojtja pretendon se në këto rrethana Ahmeti ishte sulmuar, provokuar dhe fyer në prani të familjes.
Ajo që ndodhi më pas, sipas Berishës, është po aq e rëndësishme.
Ahmeti nuk kishte tentuar ta merrte drejtësinë në duart e veta. Ai kishte kërkuar ndërhyrjen e Policisë, kishte denoncuar rastin, kishte pritur ardhjen e organeve kompetente, kishte dhënë deklaratën dhe kishte ofruar provat që posedonte.
