Juristja e mediave, Flutura Kusari është deklaruar pas pretendimeve të deputetit të VV-së se fotografimi dhe publikimi i bisedave private në sallën e Kuvendit përbën shkelje privatësie.
Kusari tha se mediat nuk e kanë shkelur privatësinë e deputetit Naim Bardiqi kur ia kanë publikuar SMS-në.
Në një analizë të detajuar ligjore, Kusari thekson se rasti duhet parë në prizmin e praktikës së Gjykata Evropiane për të Drejtat e Njeriut, duke iu referuar konkretisht rastit Von Hannover kundër Gjermanisë (Nr.1).
Sipas saj, publikimi i mesazhit është i justifikuar nga interesi i lartë publik, pasi përmbajtja lidhet me mënyrën e funksionimit të Lëvizja Vetëvendosje, partia më e madhe në vend, në një kontekst të ndjeshëm politik. Ajo thekson se nuk bëhet fjalë për komunikim privat personal, por për një mesazh që lidhet drejtpërdrejt me funksionin publik të deputetit.
Kusari nënvizon gjithashtu se si figurë publike, Bardiqi i nënshtrohet një niveli më të lartë të vëzhgimit nga media dhe opinioni publik. “Deputetët duhet të jenë të vetëdijshëm se veprimet dhe komunikimet e tyre në ambiente publike mund të bëhen objekt raportimi,” shprehet ajo.
Në analizën e saj, ajo trajton edhe çështjen e pritjes për privatësi, duke theksuar se në hapësirat ku janë të pranishëm gazetarë dhe kamera, kjo pritje është e kufizuar. Megjithatë, ajo bën dallim të qartë mes komunikimeve me interes publik dhe atyre plotësisht private, të cilat sipas saj nuk duhet të publikohen.
Sa i përket mënyrës së raportimit, Kusari vlerëson se publikimi është bërë në mënyrë faktike dhe jo sensacionale, pa përdorim të metodave të paligjshme si kamera të fshehta. Ajo shton se autenticiteti i mesazhit nuk është vënë në dyshim.
Në përfundim, juristja e mediave shpreh bindjen se çdo ankesë eventuale në institucionet përkatëse apo në gjykata do të ishte e pasuksesshme, pasi publikimi përmbush kriteret ligjore për raportim në interes të publikut.
“Sipas standardeve të Gjykatës Evropiane për të Drejtat e Njeriut, kjo është analiza ime ligjore:
1. Interesi publik – Media ka publikuar një SMS që tregon mënyrën e funksionimit të Lëvizjes Vetëvendosje, partia më e madhe dhe më e fuqishme në vend. Rrjedhimisht, mënyra e funksionimit të saj, sidomos në situata me tensione të larta politike, është patjetër në interes të publikut që të bëhet publike.