Jetmir Prekalla kandidat i PDK-së për kryetar të Deçanit

Garës për të parit të Deçanit iu shtua edhe Jetmir Prekalla nga PDK, shkruan GazetaDemos.

Prekalla tregoi se vizionin e tij për Deçanin e ka ndërtuar mbi pesë shtylla.

I plotë:

Të nderuar qytetarë të Deçanit,

Me përgjegjësi të lartë dhe përkushtim të sinqertë, sot para jush prezantoj kandidaturën time për Kryetar të Komunës së Deçanit nga radhet e Partisë Demokratike të Kosovës “PDK”. Ky hap është një mision i përbashkët për të sjellë ndryshimin e nevojshëm, zhvillimin e qëndrueshëm dhe mirëqenien e secilit qytetar të komunës sonë.

Vizionin tim për Deçanin e kam ndërtuar mbi pesë shtylla kryesore:

1. Zhvillim ekonomik dhe infrastrukturor – hapje të vendeve të reja të punës duke vënë prioritet fuqizimin e vajzave dhe grave në biznes – duke mbështetur bizneset vendore, agrobiznesin dhe turizmin, si sektorët me potencial më të madh.

2. Shërbimet komunale dhe administratë efikase – duke ofruar shërbime komunale efikase dhe transparente, administratë cilësore në funksion të qytetarit– shërbime komunale përmes digjitalizimit të shërbimeve (Smart City) dhe qeverisjes me integritet.

3. Arsimi/Rinia/ Kultura- Investim në arsimin, në rininë dhe kulturën – duke i dhënë rinisë hapësira për zhvillim profesional, sportiv dhe kreativ, që ata të mos shohin të ardhmen jashtë vendlindjes, por këtu në Deçan.

4. Shëndetësia – Kujdes më i mirë, shërbime më cilësore shëndetësore, kushte moderne të infrastrukturës shëndetësore si dhe duke ofruar kujdes dhe dinjitet për të moshuarit në komunën tonë

5. Mjedisi– Komuna Ekologjike dhe e qëndrueshme – duke ofruar trajtimin e duhur të ujrave, krijimin e hapësirave të reja publike, menaxhimin e duhur të mbeturinave dhe mbrojtjen e natyrës.

Unë besoj thellë se Deçani ka potencialin të bëhet një shembull i komunës moderne, me ekonomi të fortë, infrastrukturë bashkëkohore dhe një shoqëri gjithëpërfshirëse. Ky vizion nuk mund të arrihet vetëm, por bashkë me ju, me dijeninë, përvojën dhe energjinë e secilit qytetar të vyeshëm të komunës sonë.

Prandaj, kërkoj besimin dhe përkrahjen tuaj që, së bashku, të ndërtojmë një Deçan më të zhvilluar, më transparent dhe më të drejtë për të gjithë.

Deçani është shtëpia jonë. Të punojmë bashkë për ta bërë atë vendin më të mirë për të jetuar.

Është koha për Deçanin!

Me respekt,

Jetmir Prekalla

Kandidat për Kryetar të Komunës së Deçanit