Gjykata Themelore në Prishtinë ka vendosur në favor të invalidit të Ushtrisë Çlirimtare të Kosovës për pension invalidor .
Lajmin e ka konfirmuar avokati i tij Nazim Mehmeti, i cili e konsideroi lëndën e fituar si sukses të madh.
Me vendim të Gjykatës, Ministria e Punës dhe Mirëqenies Sociale – Departamenti i Pensioneve, detyrohet që paditësit t’ia kompensojë në mënyrë retroaktive pagesën në emër të pensionit të skemës së invalidit të UÇK-së, në vlerë mbi 20 mijë euro.
“Për veteranët dhe invalidët e UÇK-së, të cilët duhet të kenë përkujdesje të veçantë për shkak të gjendjes së rënduar shëndetësore, komisioni për veteranë dhe invalidë të UÇK-së, që është në kuadër të ministrisë përgjegjëse për punë dhe vlerat e luftës, shpesh ua refuzon kërkesat lidhur me njohjen e shkallës së invaliditetit. Por, drejtësia po vihet në vend nga gjykatat, të cilat në shumë raste ua kanë njohur këtë të drejtë.
Ky është një sukses i madh, pasi në dhjetëra raste kemi triumfuar në gjykatë, duke mbrojtur të drejtat e atyre që sakrifikuan për lirinë e vendit”, tha ai.
