Një mosmarrëveshje mes dy vëllezërve nga Malisheva dhe një patrulle policore ka përfunduar me arrestime, pasi dyshohet se ata kanë penguar dhe sulmuar zyrtarët policorë gjatë kryerjes së detyrës.
Sipas Policisë, incidenti nisi pas shqiptimit të një gjobe për kundërvajtje në trafik, të cilën të dyshuarit nuk e pranuan, ndërsa situata më pas eskaloi në pengim dhe sulm ndaj policëve.
Policia ka arrestuar njërin prej vëllezërve në vendin e ngjarjes, ndërsa tjetri dyshohet se më pas ka shkuar në stacionin policor në Malishevë, ku ka sulmuar fizikisht zyrtarët policorë.
Tre policë kanë marrë lëndime trupore dhe janë trajtuar në Qendrën e Mjekësisë Familjare në Malishevë. Sipas QMF-së, njëri ka pasur lëndime në parakrahun e majtë dhe qafë, tjetri në dorën e djathtë, ndërsa i treti në afërsi të syrit të djathtë dhe në shputën e këmbës.
