“I paaftë”, Çitaku Kurtit pas letrës: Ose qeveris, ose lëshoi rrugë – ti s’je armiku ynë, je vetëm një sfidë

Deputetja e Partisë Demokratike të Kosovës, Vlora Çitaku, ka reaguar pas letrës së kryeministrit Albin Kurti, ku njoftoi se nuk ka marrëveshje me opozitën për çështjen e Presidentit.

Për këtë temë, Kurti fajësoi partitë opozitare.

E Çitaku, në reagimin e saj, tha se Kosova “fatmirësisht nuk është vetëm e jotja”, ndërsa i kërkoi të lëshojë rrugë nëse nuk dëshiron të qeveris.

“Kryeministër, qetësohu. Përkundër kapjes së institucioneve, Kosova fatmirësisht nuk është vetëm e jotja. Si do t’ia shpjegosh popullit që t’i dhanë 51% të votave se nuk dëshiron e nuk din të qeverisësh?”

“Këtë e di ti, mirëpo çfarë di unë është se ti do ta marrësh përgjigjen e merituar nga ta. Prandaj, lutja ime është krejt e sinqertë: Ose qeveris, bashkëpuno e jepi drejtim Kosovës, ose lësho rrugë e lëri më ankesat, krizat e lojërat fëmijërore në kurriz të qytetarëve”, shkroi Çitaku në Facebook .

Ndër të tjera, deputetja e PDK-së i tha Kurtit se “ti nuk je armiku ynë”.

“Ti je vetëm një sfidë që, në ditën kur nuk do të jesh në drejtimin e vendit, për shtetin dhe qytetarët do të bëhet shumë më mirë”.

Në fund, Vlora Çitaku e quajti kryeministrin Kurti “të paaftë”, teksa i tha se “populli do të flasë me votë”.

“Shihemi në zgjedhje, atje ku ky popull i abuzuar politikisht nga ti për shumë vjet, do të flasë me votë. I paaftë”!