Hoxha: Shqipëria synon anëtarësimin në BE brenda kësaj dekade

Ministri i Shqipërisë për Evropën dhe Punët e Jashtme, Ferit Hoxha, ka zhvilluar sot në Tiranë një takim me një delegacion të Komisionit për Çështjet Evropiane të Asambleja Kombëtare e Francës, të udhëhequr nga Pierre-Alexandre Anglade.

Në fokus të bisedimeve ishin procesi i zgjerimit të Bashkimi Evropian, ecuria e reformave dhe rëndësia e ruajtjes së një procesi të besueshëm dhe të qëndrueshëm të integrimit për vendet aspirante.

Gjatë takimit, Hoxha ritheksoi përkushtimin e Shqipërisë për të vazhduar reformat dhe për të përshpejtuar rrugën drejt anëtarësimit në Bashkimin Evropian. Ai nënvizoi se vendi synon të bëhet pjesë e BE-së brenda kësaj dekade, duke u mbështetur në një plan të qartë dhe në rezultatet e arritura deri më tani.

“Me një plan të qartë, rezultate konkrete dhe ambicien për t’u bërë anëtare e Bashkimit Evropian brenda kësaj dekade, Shqipëria është e vendosur të shfrytëzojë këtë dritare historike mundësie, duke kontribuar njëkohësisht në një Evropë më të fortë, më të sigurt dhe më të bashkuar”, deklaroi Hoxha.

Kryediplomati shqiptar vlerësoi gjithashtu mbështetjen e Francës për procesin e zgjerimit, duke theksuar se angazhimi i Parisit, përfshirë bashkëpunimin në nivel parlamentar, është një element i rëndësishëm për forcimin e perspektivës evropiane të Shqipërisë dhe vendeve të Ballkanit Perëndimor.