Deputeti nga Lidhja Demokratike e Kosovës, Lutfi Haziri, thotë se muaji prill do të jetë vendimtar për të ardhmen politike në Kosovë, duke theksuar se ky është momenti që do të tregojë nëse ekziston vullnet për bashkëpunim ndërmjet subjekteve politike
Haziri thekson se pa një marrëveshje bashkëpunimi nuk mund të ketë rezultat konkret, duke nënvizuar se pragmatizmi dhe kompromisi janë vlera thelbësore politike dhe jo shenja dobësie.
“Prilli është muaji që do të determinojë nëse ka vullnet politik në Kosovë, nëse ka marrëveshje për bashkëpunim, pa të cilën nuk del rezultati, sepse pragmatizmi dhe kompromisi janë vlera politike e jo dobësi”, tha ai.Haziri paralajmëroi se në mungesë të pragmatizmit, vendi mund të përballet me dy skenarë, zgjidhje përmes Gjykatës Kushtetuese të Kosovës ose organizimin e zgjedhjeve të reja, të cilat ai i cilësoi si të kushtueshme rreth 8 milionë euro.
Ndër të tjera ai thekson se vendi nuk meriton qeverisje tjetër pos asaj euroatlantike, ku sipas tij LDK tash e 37 vjet beson, punon e ndërton.“Sa më shumë fiton mbështetje, bëhesh më i përgjegjshëm, sepse duhet ndarë me të tjerët. Në të kundërtën, Kosova, për mungesë pragmatizmi, duhet të zgjedhë përmes gjykatësve të Gjykatës Kushtetuese ose zgjedhjeve 8-milionëshe. Ky popull i Kosovës është europian me orientim, nuk meriton qeverisje tjetër pos asaj euroatlantike, ku LDK tash e 37 vjet beson, punon e ndërton!”, përfundoi Haziri për GazetaBlic.
