Kandidati i PDK-së për deputet, Bekim Haxhiu, ka reaguar pasi Gjykata Supreme refuzoi ankesën e tij, me të cilën kishte kërkuar rinumërimin e votave preferenciale të kandidatëve të PDK-së nga zgjedhjet parlamentare të 7 qershorit.
Në një postim publik, Haxhiu tha se e respekton institucionin e Gjykatës Supreme, por se nuk pajtohet me vendimin dhe arsyetimin e saj, duke pretenduar se janë injoruar prova të reja që, sipas tij, dëshmojnë parregullsi në procesin e numërimit.
Ai tha se ankesa e tij ishte mbështetur në Raportin Zyrtar të Sekretariatit të KQZ-së për rinumërimin e 185 vendvotimeve, për të cilin pretendon se ka evidentuar gabime në 38 komuna dhe një ndryshim prej 10.71 për qind të votave të PDK-së në 5,201 vota të rinumëruara.
Sipas Haxhiut, gabimet nuk kanë qenë të izoluara, por të përhapura në të gjitha komunat ku është bërë rinumërimi, me përqindje që, sipas tij, variojnë nga 6.05 deri në 24.89 për qind.
Ai po ashtu akuzoi Komisionin Qendror të Zgjedhjeve se nuk i ka vënë në dispozicion të gjitha të dhënat për ndryshimet e votave për secilin kandidat, duke thënë se kjo ka cenuar barazinë procedurale.
