Deputetja e Aleancës Teuta Haxhiu, ka folur në Kuvend për siç tha ajo sulmet ndaj Daut Haradinajt.
Ajo përmendi në fjalimin e saj bashkëshortin e kryetares së Kuvendit Albulena Haxhiun dhe ish-ministrin tani kryetarin e Mitrovicës Jugore Faton Pecin.
Për këtë të fundit, Haxhiu tha se Peci njihet për skandale.
"Mbahet në mend që i ka ushqyer fëmijet në çerdhe me mish me afat të skaduar", deklaroi ajo.
Tutje deputetja e Aleancës kritikoi ashpër pushtetin për mosndarjen e 1 milion eurove për protezat për invalidët e luftës.
Teuta Haxhiu paraqiti publikisht një rast të një personi i cili është sipas saj 90% invalid dhe protezat i ka siguruar me shumë mund, me ndihmëb e miqve të tij.
Teksa i përfundoi koha, e njëjta kërkoi nga kryekuvendarja edhe një minutë shtesë, kërkesë që u kundërshtua nga Haxhiu.
Deputetja e Aleancës, Teuta Haxhiu nuk ka lëshuar foltoren e Kuvendit, edhe pas përfundimit të minutave që janë të paraparë për një deputet gjatë deklarimeve jashtë rendit të ditës.
Lidhur me këtë, kryetarja e Kuvendit, Albulena Haxhiu i bëri thirrje të zgjedhurës së popullit të mos e pengojë procesin e seancës.
“Dil në një konferencë për media, ose shfrytëzoje një moment tjetër”, iu drejtuar Haxhiu, Haxhiut.
