Ambasadori i Britanisë së Madhe në Kosovë, Jonathan Hargreaves, ka theksuar rëndësinë që Kuvendi i ri të jetë në gjendje të zgjedhë presidentin pas zgjedhjeve, në mënyrë që të shmangen bllokada institucionale dhe zgjedhje të reja.
Pas takimit me përfaqësues institucionalë, Hargreaves tha se është diskutuar nevoja për kompromis mes partive politike për të siguruar funksionim normal të institucioneve.
“Sot në mëngjes u takova me ushtruesen e detyrës së presidentes dhe kryetares së Kuvendit, Albulena Haxhiu. Diskutuam rëndësinë që Kuvendi i ri të jetë në gjendje ta zgjedhë presidentin pas zgjedhjeve, për të shmangur zgjedhje të tjera dhe humbjen e mundësive për Kosovën”, ka shkruar ai.
Ambasadori britanik gjithashtu ka ngritur shqetësimin për gjuhën dhe sulmet ndaj grave politikane në rrjetet sociale, duke e cilësuar atë si “abuzim të tmerrshëm” dhe ka bërë thirrje që liderët politikë ta dënojnë këtë fenomen.
