Haradinaj përgëzon kryetarët e rinj, dënon heqjen e simboleve të Kosovës në veri

Kreu i Aleancës për Ardhmërinë e Kosovës, Ramush Haradinaj, ka reaguar pas betimit të kryetarëve të komunave, duke përgëzuar të gjithë ata që kanë marrë detyrën, me theks të veçantë pesë kryetarët nga radhët e AAK-së. Ai i inkurajoi ata që të vazhdojnë punën në interes të qytetarëve dhe në përputhje me ligjin e Kushtetutën e vendit.

Haradinaj ka shprehur indinjatën e tij ndaj kryetarëve të Listës Serbe në komunat veriore, të cilët, sipas tij, kanë hequr simbolet e Republikës së Kosovës dhe fotografinë e Presidentes.

Ai kërkoi që këto simbole të rikthehen urgjentisht “në vendin që u takon”, ndërsa u bëri thirrje Bashkimit Evropian, Shteteve të Bashkuara dhe komunitetit ndërkombëtar që të ushtrojnë ndikimin e tyre për t’u siguruar që kryetarët nga komuniteti serb të respektojnë Kushtetutën dhe ligjet e Kosovës dhe të punojnë në harmoni me to.

“I përgëzoj të gjithë kryetarët e komunave që kanë dhënë betimin, me theks të veçantë 5 kryetarët prej radhëve të AAK dhe i inkurajoj të vazhdojnë punën e tyre në interes të qytetarëve dhe gjithmonë në përputhje me ligjin e Kushtetutën.

Njëkohësisht jam tejet i indinjuar që kryetarët e Listës serbe në komunat veriore, i kanë hequr simbolet e Republikës së Kosovës dhe fotografinë e Presidentes dhe kërkoj që urgjentisht t’i rikthejnë në vendin që u takon. Po ashtu, edhe nga Komuniteti Ndërkombëtar, BE dhe ShBA, që të ushtrojnë ndikimin e tyre që kryetarët e komunave nga komuniteti serb ta respektojnë Kushtetutën dhe ligjet e Kosovës dhe të punojnë në harmoni me to!”, shkroi ai.