Emisari i Shteteve të Bashkuara për Misione të Posaçme, Richard Grenell, ka reaguar ndaj presidentes së Kosovës, Vjosa Osmani, duke e akuzuar për “manipulim të fjalëve” të presidentit amerikan, Donald Trump, pas deklaratës së saj për “informacione të besueshme” se presidenti Trump, ka parandaluar një sulm të Serbisë në Kosovë.
“Turp për Osmanin që manipulon fjalët e presidentit Trump”, ka shkruar ai në platformën “X” të dielën, duke rikujtuar se presidenti Trump ishte nominuar për Çmimin Nobel për Paqe për angazhimin e tij në normalizimin ekonomik Kosovë-Serbi, pas nënshkrimit të Marrëveshjes së Uashingtonit në Shtëpinë e Bardhë në vitin 2020.
“Osmani nuk ka qenë pjesë e asaj marrëveshjeje. Dhe të pretendosh sikur ka ndodhur diçka e re është absurde,” ka shtuar ish-emisari i presidentit Trump për dialogun Prishtinë-Beograd.