Gjykata e Apelit në Prishtinë ka vërtetuar vendimin e shkallës së parë, me të cilin ishte refuzuar kërkesa e Prokurorisë së Shtetit për vendosjen e urdhrit ndalues përfundimtar, duke u dhënë të drejtë blerësve me mirëbesim në aferën e pronave në Veternik.
Pas një procesi gjyqësor që zgjati me muaj, Gjykata e Apelit e Republikës së Kosovës e ka refuzuar si të pabazuar ankesën e Prokurorisë Themelore në Prishtinë dhe ka lënë në fuqi aktvendimin e Gjykatës Themelore, me të cilin ishte refuzuar kërkesa për vendosjen e urdhrit ndalues përfundimtar ndaj parcelave që ndodhen në pronësi të palëve të treta dhe blerësve me mirëbesim në rastin e njohur të pronave në Veternik.
Me këtë vendim, Gjykata e Apelit ka konfirmuar se urdhri ndalues përfundimtar mbetet në fuqi vetëm për parcelat që vazhdojnë të jenë në pronësi të të akuzuarve Milihat Gashi dhe Ylber Hyseni, ndërsa është refuzuar kërkesa e Prokurorisë për bllokimin e parcelave që, ndërkohë, janë në pronësi të personave të tretë.
Ndër parcelat e përfshira në këtë vendim është edhe parcela nr. 10433-0, në bashkëpronësi të kompanisë ndërtuese “Lirimi & Acl” Sh.P.K., si dhe parcela nr. 10553-0, në bashkëpronësi të kompanisë ndërtuese “Miri” Sh.P.K., për të cilat Gjykata ka refuzuar kërkesën e Prokurorisë për vendosjen e urdhrit ndalues.
Në arsyetimin e aktvendimit, Gjykata e Apelit ka lënë në fuqi vlerësimin e Gjykatës së shkallës së parë, duke konstatuar se nuk janë plotësuar kushtet ligjore për kufizimin e të drejtës së pronësisë ndaj palëve të treta, ngase parcelat për të cilat është refuzuar masa nuk figurojnë më në pronësi të personave të akuzuar dhe nuk ekzistojnë prova se pronarët aktualë kanë kryer ndonjë vepër penale ose kanë ditur se pasuria e fituar prej tyre përbënte dobi pasurore të përfituar nga vepra penale apo dhuratë të njollosur.