Gazmend Muhaxheri: Fuqia e qytetit tonë qëndron te njerëzit e ndershëm dhe punëtorë

Kryetari i Komunës së Pejës, Gazmend Muhaxheri, ka shkruar pas takimeve të zhvilluara me qytetarët në fshatrat Çallapek, Vranoc, Kotradiq dhe Baran, ku thekson rolin vendimtar të qytetarëve në zhvillimin dhe forcën e komunës.

“Çallapeku, Vranoci, Kotradiqi dhe Barani na treguan pse Peja është e fortë: sepse mbështetet mbi njerëz të ndershëm e punëtorë”, shkruan Muhaxheri në postimin e tij.

Ai tha se gjatë takimeve është diskutuar hapur për projektet e realizuara dhe sfidat që i presin në të ardhmen, ndërsa e cilësoi mirëpritjen e qytetarëve si dëshmi të mbështetjes për punën e bërë deri tani.

“Peja ecën përpara me punë konkrete e vizion të qartë për të ardhmen e qytetarëve. Ky është besimi që na jep forcë për mandatin e katërt – jo për pushtet, por për më shumë punë në shërbim të njerëzve”, theksoi kryetari.

Muhaxheri, i cili po synon mandatin e katërt si udhëheqës i Pejës, u zotua për vazhdim të projekteve zhvillimore dhe për një qeverisje të mirë.