Gashi për amendamentet për president: Lojë e lodhur e manovër politike, është proces që zgjat me muaj

Arben Gashi, nga Lidhja Demokratike e Kosovës, ka reaguar pasi që presidentja Vjosa Osmani ka proceduar në Kuvend amendamentet kushtetuese për zgjedhje të drejtpërdrejta të Presidentit/es, për të cilat tha se ishin hartuar nga Komisioni për amendamentimin e Kushtetutës në vitin 2011.

Gashi ka thënë se zgjedhjet janë ‘’rruga e vetme’’ nëse deri në mesnatë nuk zgjidhet presidenti i ri i vendit.

‘’Idetë për amendamente kushtetuese, të hedhura sot pas pesë vitesh në pushtet, nuk janë gjë tjetër veçse manovra politike për simpati momentale. Një lojë e lodhur dhe aspak produktive’’, ka thënë ai mes tjerash.

Gashi ka thënë edhe se amendamentet duhet të kalojnë në Gjykatën Kushtetuese për vlerësim të kushtetutshmërisë dhe më pas në Kuvend me shumicë të dyfishtë 2/3, përfshirë edhe votat e komuniteteve joshumicë, gjë e cila, ka shtuar Gashi, është një proces që zgjat muaj të tërë dhe rrezikon stabilitetin institucional.

Postimi:

Jo-serioziteti politik dhe kushtetues në Kosovë

Gjendja e krijuar është pasojë e mungesës së pjekurisë politike. Ajo po shoqërohet me inate, emocione negative personale dhe mungesë të ndjeshmërisë institucionale. Edhe më shqetësuese është mungesa e përgjegjësisë për ta kuptuar momentumin politik ndërkombëtar në të cilin ndodhet bota, por edhe Kosova.

Nëse deri në mesnatë nuk zgjidhet Presidenti/Presidentja, rruga e vetme që mbetet janë zgjedhjet e jashtëzakonshme. Kushtetuta është e qartë dhe parashikon disa momente kur vendi shkon në zgjedhje për shkak të moszgjedhjes së Presidentit/es:

Presidenti/ja duhet të zgjidhet jo më herët se 60 ditë dhe jo më vonë se 30 ditë para përfundimit të mandatit. Mosveprimi, pra moszgjedhja e Presidentit/es, e çon vendin direkt në zgjedhje brenda 45 ditëve.

Nëse mandati përfundon para kohe, brenda 60 ditëve duhet të zgjidhet Presidenti/ja e re. Në rast dështimi, vendi përsëri shkon në zgjedhje të jashtëzakonshme.

Në rast vdekjeje, shkarkimi, dorëheqjeje apo arsye tjetër dhe kur vendi ndodhet në proces zgjedhor deri në 6 muaj, detyrën e Presidentit/es e ushtron Kryetari/ja e Kuvendit, deri në konstituimin e Kuvendit të ri.

Idetë për amendamente kushtetuese, të hedhura sot pas pesë vitesh në pushtet, nuk janë gjë tjetër veçse manovra politike për simpati momentale. Një lojë e lodhur dhe aspak produktive.

Sepse:

Prandaj zgjedhja është e qartë:

Ose zgjidheni Presidentin deri në mesnatë, ose nesër shpallen zgjedhjet që duhet të mbahen brenda 45 ditëve.

Bllokada institucionale dhe krizat artificiale janë të dëmshme për interesin nacional të shqiptarëve dhe për interesin shtetëror të Kosovës.