Gati një javë pas vendimit denues të Hagës, familjeve Thaçi, Veseli, Krasniqi e Selimi u shkoi ftesë për takim nga ushtruesja e detyrës së presidentes, Albulena Haxhiu.
Por realizimi i takimit, të paktën me të gjithë familjarët e tyre, po duket vështirë i arritshëm.
Përgjigja e parë erdhi qysh mbrëmë nga familja e ish-zëdhënësit të UÇK-së, Jakup Krasniqit, përmes djalit të tij.
“Ne presim me ardh në shtëpi tonë kushdo që dëshiron”, ka deklaruar Altin Krasniqi, djali i Jakup Krasniqit.
Që ftesën e kanë pranuar e konfirmoi edhe familja Veseli veçse as këta s’treguan a do të marrin pjesë.
Se si do t’i përgjigjen ftesës së Haxhiut, nuk treguan as familjarë të ish-presidentit Thaçi.
Por pozitivisht ushtruesës së detyrës së presidentës i ëshë përgjigjur, gruaja e Rexhepit, Shqipe Selimi.
Qëllimin e ftesës për takim, Zyra e Presidentes e ka sqaruar në një përgjigje ku bënë të ditur se aty synojnë të diskutojnë për rrugën dhe strategjinë që duhet ndjekur, për çka edhe është vlerësuar që këto tema të diskutohen me familjarët.
Pjesë e takimit, sipas presidencës, është paraparë të jenë edhe edhe ministrat, Andin Hoti e Ejup Maqedonci, derisa janë përgjigjur nëse Haxhiu, është e gatshme t’i vizitojë familjet në shtëpitë e tyre.
“Sa u përket vizitave në shtëpitë e familjeve, U.d. Presidentja është e gatshme t’i vizitojë familjet edhe në shtëpitë e tyre. Megjithatë, duke pasur parasysh peshën e kësaj çështjeje, është vlerësuar me rëndësi që takimi i parë të zhvillohet në Presidencë. Mbajtja e takimit në institucion i jep atij peshën dhe karakterin institucional që kërkon kjo çështje dhe e bën të qartë se bëhet fjalë për një çështje që meriton vëmendjen e institucionit më të lartë të shtetit. Kjo, natyrisht, nuk i përjashton vizitat apo takimet e tjera me familjet.”
Takimi është paralajmëruar se do të mbahet gjatë kësaj jave dhe pas konfirmimit të pjesëmarrjes, do të caktohet dita dhe ora./TVDUKAGJINI
