Ferat Shala: Kurti ka harruar premtimet e tij – Zajednica po jetësohet gradualisht me garanci evropiane

Kryeministri i Kosovës, Albin Kurti, ka bërë të ditur se nga 15 marsi do të nisë zbatimi i plotë i Ligjit për të Huajt dhe Ligjit për Veturat .

Lidhur me këtë çështje, në një prononcim për GazetaBlic , ka reaguar deputeti nga radhët e PDK-së, Ferat Shala, i cili thotë se qeveria ka harruar qëndrimet kundër Zajednicës, strukturave paralele dhe negociatave pa kushte, duke e zëvendësuar këtë me një agjendë që favorizon gradualisht autonominë serbe në Kosovë.

“Albin Kurti erdhi në pushtet me parulla dhe strategji për bashkim kombëtar; kundër Zajednicës, kundër strukturave paralele dhe kundër negociatave pa kushte, pa u zbardhur më parë çështja e të zhdukurve, e të tjera. Sot duket se ai i ka harruar këto qëndrime, edhe premtimet e tij. Në vend të tyre, po shohim kalimin e plotë drejt një agjende tjetër, të cilën po e zbaton hap pas hapi. Kjo, në thelb, paraqet vazhdimin de jure të jetësimit të autonomisë serbe në Kosovë. Pikërisht kjo është edhe thelbi i autonomisë që buron nga Marrëveshja e Ohrit: vetëmenaxhimi në fusha të caktuara si arsimi, shëndetësia, sistemi energjetik (p.sh. Elektroserver), çështjet e dokumenteve dhe fusha të tjera që mund të dalin në vazhdim”, u shpreh Shala.

Ai kritikoi gjithashtu mungesën e transparencës në negociatat me Serbinë dhe theksoi se vendi po hyn në vitin e dytë pa institucione funksionale.

“Situata bëhet edhe më shqetësuese për faktin se nuk ka transparencë se kur dhe si po zhvillohen negociatat me Serbinë. Në të njëjtën kohë, vendi tashmë ka hyrë në vitin e dytë pa institucione të mirëfillta funksionale”, tha ai.

Shala thekson se Zajednica po jetësohet gradualisht me garanci evropiane, ku ndërkohe po zhvillohet edhe një diskurs kritik ndaj Shteteve të Bashkuara të Amerikës dhe Opozitës.

“Në këtë kontekst, Zajednica po jetësohet gradualisht, me garanci evropiane, ndërkohë që paralelisht zhvillohet një diskurs kritik edhe ndaj Shteteve të Bashkuara të Amerikës dhe Opozitës”, përfundoi ai.