Fatos Qerimaj ka reaguar publikisht pasi, sipas tij, zyra e tij si Drejtor i Autoritetit Rajonal të Pellgjeve Lumore (ARPL) është uzurpuar në mënyrë të dhunshme dhe me urdhër të kundërligjshëm.
Qerimi e ka cilësuar këtë veprim si “akt të papranueshëm dhe të rrezikshëm për rendin institucional”, duke thënë se janë shkelur ligji dhe autorizimet zyrtare, si dhe është cenuar dinjiteti institucional dhe profesional.
Ai ka deklaruar se institucionet e Republikës së Kosovës nuk duhet të shndërrohen në mekanizma të presionit politik dhe të veprimeve arbitrare ndaj zyrtarëve publikë.
“Uzurpimi i zyrës shtetërore përmes presionit dhe forcës është precedent i rrezikshëm dhe i papranueshëm në një shtet demokratik”, ka theksuar Qerimaj
Reagimi i tij:
REAGIM PUBLIK
Uzurpimi i dhunshëm i zyrës sime me urdhër të kundërligjshëm është sulm ndaj shtetit ligjor!
Sot jam përballur me një akt të papranueshëm dhe të rrezikshëm për rendin institucional, ku me urdhër të kundërligjshëm dhe në mënyrë të dhunshme është uzurpuar zyra ime si Drejtor i Autoritetit Rajonal të Pellgjeve Lumore.
Ky veprim përbën shkelje të rëndë të ligjit, tejkalim të autorizimeve zyrtare dhe cenim të drejtpërdrejtë të dinjitetit institucional dhe profesional. Institucionet e Republikës së Kosovës nuk mund të shndërrohen në mekanizma të presionit politik dhe të veprimeve arbitrare ndaj zyrtarëve publikë.
Asnjë vendim i kundërligjshëm dhe asnjë urdhër politik nuk mund të jetë mbi ligjin. Uzurpimi i zyrës shtetërore përmes presionit dhe forcës është precedent i rrezikshëm dhe i papranueshëm në një shtet demokratik.
Për këtë arsye, edhe një herë i bëj thirrje Prokurorisë Speciale të Republikës së Kosovës që të ndërmarrë urgjentisht veprime ndaj personave përgjegjës për këto veprime të kundërligjshme, të hetojë keqpërdorimin e detyrës zyrtare dhe ndërhyrjet arbitrare në administratën publike, si dhe të mbrojë rendin kushtetues dhe ligjor të vendit.
Unë do t’i ndjek të gjitha rrugët ligjore dhe institucionale për mbrojtjen e të drejtave të mia dhe për të kërkuar përgjegjësi ndaj secilit person që ka marrë pjesë apo ka urdhëruar këto veprime.
Qytetarët e Kosovës meritojnë institucione që funksionojnë mbi ligjin dhe profesionalizmin, e jo mbi presione dhe uzurpim.
Askush mbi Ligjin!
Fatos Xheladin Qerimi
Drejtor i Autoritetit Rajonal të Pellgjeve Lumore (ARPL)
