Evropa përballet me valë ekstreme të të nxehtit, mijëra banesa mbeten pa energji në Francë

Vala përvëluese e të nxehtit që ka përfshirë Evropën Perëndimore po vazhdon të shkaktojë probleme serioze, ndërsa autoritetet në veri të Francës po punojnë për rikthimin e energjisë elektrike për mijëra banesa që kanë mbetur pa rrymë.

Sipas autoriteteve franceze, ndërprerjet e energjisë që ndodhën të martën u shkaktuan nga një incident në një transformator, i lidhur me temperaturat e larta që po mbizotërojnë në vend. Përparësi në rikthimin e furnizimit me energji po u jepet qendrave shëndetësore dhe objekteve kritike, ndërsa për shtëpitë e të moshuarve janë siguruar gjeneratorë.

“Incidenti ishte aksidental dhe lidhej me valën aktuale të të nxehtit”, kanë bërë të ditur autoritetet franceze.

Temperaturat rekord në shumë vende të Evropës kanë shkaktuar probleme në transport, mbyllje të shkollave dhe kufizime në disa destinacione turistike. Sipas të dhënave të Reuters Climate Monitor, në disa zona temperaturat kanë qenë deri në 18 gradë Celsius mbi mesataren sezonale.

Shërbimi meteorologjik francez “Météo-France” ka vlerësuar se kushtet aktuale janë të krahasueshme me valën historike të të nxehtit të vitit 2003, e cila zgjati 16 ditë dhe shkaktoi rreth 80 mijë vdekje shtesë në mbarë Evropën.

Meteorologët thonë se vala aktuale po nxitet nga fenomeni atmosferik i njohur si “Blloku Omega”, i cili bllokon lëvizjen normale të masave ajrore dhe favorizon grumbullimin e nxehtësisë për disa ditë me radhë.

Ndikimi i temperaturave ekstreme po ndihet edhe në ekonomi. Kompanitë e ndërtimit kanë ndryshuar oraret e punës për të mbrojtur punëtorët nga temperaturat e larta, ndërsa kërkesa për ventilatorë dhe kondicionerë ka shënuar rritje të ndjeshme. Fermerët, ndërkaq, po detyrohen të punojnë gjatë natës për shkak të rrezikut të lartë nga zjarret gjatë ditës.

Vala e të nxehtit ka pasur pasoja edhe në jetët e njerëzve. Mediat ndërkombëtare raportojnë se dhjetëra persona kanë humbur jetën duke u përpjekur të freskohen në lumenj, liqene dhe zona të tjera ujore.

Sipas Organizatës Botërore Meteorologjike, Evropa po ngrohet me një ritëm më shumë se dy herë më të shpejtë se mesatarja globale, duke rritur gjasat për valë gjithnjë e më të shpeshta dhe më intensive të të nxehtit ekstrem.