Ekstradohet nga Hungaria 49 vjeçari nga Prizreni, i dënuar me rreth 4 vjet burgim për tri vepra penale

49-vjeçari S.T., nga fshati Gjonaj i Prizrenit, i dënuar për veprat penale “Blerja, posedimi, shpërndarja dhe shitja e paautorizuar e narkotikëve dhe substancave analoge”, “Kultivimi i bimës së hashashit, shkurres së kokainës ose bimëve të kanabisit” dhe “Mbajtja në pronësi, kontroll ose posedim të paautorizuar të armëve”, është ekstraduar nga Hungaria në Kosovë.

Policia e Kosovës ka bërë të ditur se ai ishte dënuar me 3 vjet e 10 muaj burgim dhe me një gjobë prej 4000 eurove.

I ekstraduari është dorëzuar nga autoritetet kompetente hungareze, ku është pranuar nga zyrtarët kompetent dhe më pas nga zyrtarët policorë të Stacionit Policor Prizren është dërguar në Qendrën e Paraburgimit.

“Policia e Kosovës falënderon autoritetet italiane për bashkëpunimin ndërinstitucional dhe mbetet e përkushtuar në zbatimin e urdhër-arresteve dhe procedurave ligjore në funksion të drejtësisë dhe sigurisë publike”, thuhet në njoftim.