E rëndë: Ky është punëtori që humbi jetën gjatë riparimit të energjisë në Himarë

Është publikuar fotografia e 55-vjeçarit Bashkim Boçi, punonjës i OSHEE-së, i cili humbi jetën tragjikisht gjatë një ndërhyrjeje për riparimin e defekteve në rrjetin elektrik të shkaktuara nga moti i lig në zonën e Himarës.

Boçi ishte duke punuar në shtyllë, ku po tentonte të rilidhte një kabllo energjie, kur dyshohet se iu shkëput rripi i sigurisë që e mbante të lidhur. Si pasojë, ai ka rënë nga një lartësi prej rreth 9 metrash, duke humbur jetën.

Pas kësaj ngjarjeje të rëndë, Ministria e Infrastrukturës dhe Energjisë në Shqipëri ka shprehur ngushëllimet për familjen, të afërmit dhe kolegët e 55-vjeçarit.

“Me dhimbje të thellë mora lajmin për humbjen e jetës së kolegut tonë, Bashkim Boçi, i cili ra në krye të detyrës, ndërsa ishte i angazhuar në riparimin e defekteve të shkaktuara nga moti i keq në zonën e Himarës.

Bashkimi ishte pjesë e OSSH Elbasan që prej vitit 2000 dhe e ushtroi detyrën me përkushtim dhe profesionalizëm deri në momentin e fundit.

Ngushëllimet më të sinqerta familjes, të afërmve dhe kolegëve të tij. Ndajmë dhimbjen me ta në këtë moment të vështirë dhe nderojmë me mirënjohje kontributin dhe sakrificën e Bashkim Boçit në shërbim të qytetarëve”, thuhet në reagimin e ministrisë.