E konfirmon Policia: “FAST Kosova” arrestoi personin e kërkuar për vrasje, ‘Red Notice’ u lëshua nga Danimarka

Më herët u raportua se Policia e Kosovës ka arrestuar një person në Veternik të Prishtinës, i kërkuar me urdhër arrest ndërkombëtar për vrasje me pagesë në Danimarkë.

Para pak minutash organet e rendit e kanë konfirmuar rastin përmes një komunikate për media, duke dhënë edhe detaje shtesë.

Njoftimi i plotë:

Sot, më 23.03.2026, në Prishtinë, Policia e Kosovës, pas një pune operative në terren, përkatësisht njësia ‘FAST Kosova’, në bashkëpunim me njësitë policore të rendit publik dhe Njësinë për Reagim të Shpejtë (NJRSH), ka realizuar me sukses arrestimin e një shtetasi të huaj të kërkuar nga autoritetet ndërkombëtare për veprën penale ‘vrasje’.

Arrestimi është kryer në bazë të një letër-rreshtimi ndërkombëtar (Red Notice), të lëshuar nga autoritetet e INTERPOL-it të Danimarkës.

Rasti është duke u trajtuar në koordinim të ngushtë me Prokurorinë Speciale të Republikës së Kosovës, ndërsa autoritetet kompetente janë duke ndërmarrë veprimet e mëtejme ligjore në përputhje me procedurat në fuqi.

Policia e Kosovës mbetet e përkushtuar në luftimin e krimit të organizuar si dhe bashkëpunimin ndërkombëtar për garantimin e sigurisë së përgjithshme.