Drejtori i Policisë flet para policëve të rinj për vdekjen e Agon Zejnullahut: Të përdoren të gjitha burimet për ta zbardhur rastin

Drejtori i Përgjithshëm i Policisë së Kosovës, Gazmend Hoxha, në ceremoninë e diplomimit të gjeneratës së 62 të Policisë së Kosovës ka folur për rastin tragjik të ndodhur në Lipjan, ku një 27 vjeçar ka vdekur në duar të pesë policëve kosovarë .

Hoxha ka thënë se s’do të lejojë kurrfarë tejkalimi të autorizimeve policore dhe ka kërkuar nga Inspektorati Policor i Kosovës, hetimet që kryhen brenda nga Policia dhe institucionet e tjera, që të përdorin të gjitha burimet e nevojshme për të hetuar rrethanat e vdekjes së Agon Zejnullahut.

“Nga pozita e drejtorit të Policisë s’do të lejojmë çfarëdo forme të tejkalimit të autorizimeve policore, andaj kërkoj fuqishëm, që inspektorati policor i Kosovës, hetimet tona të brendshme dhe institucionet tjera relevante të përdorin të gjitha burimet e nevojshme për të hetuar rrethanat e vdekjes së qytetarit tonë”, ka thënë Hoxha.

Ai ka kërkuar nga hetuesit e Policisë së Kosovës që të bashkëpunojnë ngushtë me IPK-në për të pasur një pasqyrë të saktë të asaj se çfarë ka ndodhur në Lipjan në natën kritike.

“Hetuesit tanë janë urdhëruar të bashkëpunojnë ngushtë me IPK për të siguruar një pasqyrë të saktë të këtij rasti fatkeq”, ka shtuar tutje Drejtori i Policisë së Kosovës.

“Do të ndërmarr të gjitha veprimet ligjore bazuar në epilogun dhe rezultatet e një hetimi të plotë” , ka thënë ndër të tjera.