Deputeti i PDK-së bën thirrje për koalicion me VV-në

Deputeti i PDK-së dhe ish-komandanti i Ushtrisë Çlirimtare të Kosovës, Rrustem Mustafa, ka bërë thirrje për krijimin e një koalicioni mes Partisë Demokratike të Kosovës dhe Lëvizjes Vetëvendosje.

Në një status të publikuar me titullin “Koalicioni për Normalitet”, Mustafa ka kërkuar nga drejtuesit e dy partive që të ulen në një tryezë dhe të bashkëpunojnë për tejkalimin e ngërçit politik.

Mustafa ka thënë se situata aktuale, me Kuvendin pa u konstituar dhe qeverinë ende të paformuar pas më shumë se katër muajsh, është shqetësuese për qytetarët.

“Unë nuk po ju flas si politikan. Po ju flas si një njeri që e do këtë vend mbi çdo gjë tjetër”, ka shkruar Mustafa.

Ai ka përmendur si shembull koalicionin PDK-LDK, duke thënë se koalicionet e mëdha mund të funksionojnë kur, sipas tij, interesat shtetërore vendosen mbi dallimet partiake.

Mustafa ka kërkuar që PDK-ja dhe LVV-ja të lënë mënjanë përplasjet politike dhe të fokusohen në çështje që lidhen me zhvillimin e vendit.

“Le t’i lëmë mënjanë egot. Le t’i lëmë mënjanë fjalët e ndezura të së kaluarës. Le të flasim për rrugët, për shkollat, për spitalet dhe për mirëqenien e qytetarëve tanë”, ka deklaruar ai.

Në fund, ish-komandanti i UÇK-së u ka bërë thirrje kryetarëve të PDK-së dhe LVV-së që të ulen bashkë në një tryezë, duke theksuar se Kosova nuk ka më kohë për të pritur.

“Unë jam gati të jap të gjithë përvojën time për këtë bashkim. A jeni gati edhe ju?”, ka shkruar Mustafa.