Një nga problemet më të mëdha të administratës Trump për t’u tërhequr nga lufta me Iranin është lista e qëllimeve shumë absolute që Presidenti Donald Trump dhe ekipi i tij kishin përcaktuar, shkruan CNN.
Qëllimet kanë përfshirë dorëzimin e plotë të Iranit, ndryshimin e regjimit, që Irani të mos ketë kurrë një armë bërthamore dhe përfundimin e mbështetjes së Teheranit për grupet e tij aleate në Lindjen e Mesme, si Hezbollahu.
Ndërsa lufta – tashmë në muajin e saj të gjashtë – është zgjatur, kjo listë qëllimesh është ndryshuar dukshëm dhe është reduktuar. Dhe nënpresidenti JD Vance duket se e ka reduktuar së fundmi në mënyrë të jashtëzakonshme, duke dhënë sinjalin më të fundit se administrata mund të jetë duke u përgatitur të kënaqet me më pak – ndoshta edhe shumë më pak.
Duke folur në Fox News të enjten, Vance u pyet se si mund të përfundojë lufta. Ai renditi dy qëllime.
“Është të sigurojmë që vendet e Gjirit të vazhdojnë të dërgojnë naftë dhe gaz në ekonominë botërore, në mënyrë që të kemi stabilitet të çmimeve të energjisë”, tha ai, duke shtuar: “Ky është qëllimi numër një: Të mbajmë naftën dhe gazin të lirë për amerikanët në të gjithë vendin”.
“Dhe pastaj, natyrisht, qëllimi numër dy është të sigurojmë që Irani të mos ketë kurrë një armë bërthamore”.
Kjo nuk është lista e vjetër e qëllimeve të administratës – dhe renditja në të cilën Vance i vendosi ato është domethënëse.
Kur u pyet të premten për komentet e Vance, sekretarja e shtypit e Shtëpisë së Bardhë, Karoline Leavitt, këmbënguli se “të dyja qëllimet janë njësoj të rëndësishme për presidentin”.
Administrata pothuajse gjithmonë e ka përshkruar parandalimin e Iranit që të ketë një armë bërthamore si shqetësimin kryesor.
Dhe edhe nëse qëllimet janë vërtet të barabarta në këndvështrimin e administratës, përfshirja e çmimeve të naftës dhe gazit – dhe jo të tjera – është një ndryshim i rëndësishëm.
