Çitaku: Me taksat tona po financohen narracionet e Serbisë

Grupi Parlamentar i Partisë Demokratike të Kosovës (PDK) ka braktisur seancën e Kuvendit të Kosovës të enjten, pasi nuk u pranua kërkesa që draft-rezoluta për mbrojtjen e së vërtetës dhe viktimave të luftës të vendosej si pikë e parë e rendit të ditës për votim.

Nisma u propozua nga deputetja e PDK-së, Vlora Çitaku, e cila kërkoi që çështja të trajtohej me prioritet të plotë, duke e cilësuar si një ndër temat më të rëndësishme për Kuvendin.

Pas dështimit të arritjes së një kompromisi me Lëvizjen Vetëvendosje, e cila kërkoi harmonizimin e draftit me propozimet e saj, PDK vendosi të tërheqë dokumentin dhe të largohet nga salla. Sipas Çitakut, teksti kishte qenë i dorëzuar që të mërkurën dhe kishte pasur kohë të mjaftueshme për shqyrtim.

Në një deklarim për FIVE, Çitaku ka theksuar se Kuvendi ka dështuar të adresojë një çështje që, sipas saj, është thelbësore për shtetin.

“Nuk ka pas sot asnjë çështje me të rëndësishme, as për debat, as për diskutim e as për miratim. Historia jonë po goditet nga jashtë e fatkeqësisht disa elemente po financohen nga brenda. Sot në emër të PDK-së foli Nait Hasani, i mbijetuar i masakrës së Dubravës. Ne kemi edhe kolegë të tjerë që janë të mbijetuar të asaj masakre. Dhe me taksat tona të sponsorizohen narracionet e krijuara në Serbi është e papranueshme…”, ka thënë Çitaku.