Faton Bislimi, një ndër emrat që është përfolur javët e fundit për postin e presidentit, ka reaguar disa ditë pasi u bë i ditur kandidati konsensual i Vetëvendosjes dhe LDK-së, Bekim Sejdiu.
Në një postim të gjatë, ai tha se ka marrë shumë mbështetje për propozimin që ai të konsiderohet për kryetar shteti.
"Kam marrë mbështetje të jashtëzakonshme nga njerëz që dashurinë për Kosovën e kanë dëshmuar me jetë e me vepra; nga miq të dëshmuar të Kosovës në Shtetet e Bashkuara të Amerikës, përfshirë ambasadorin William Walker dhe ish-kongresmenin Joe DioGuardi; nga familjet e heronjve Sali Çekaj dhe Agim Ramadani; nga shqiptarët e Luginës së Preshevës; nga miq e kolegë të mi nga Harvard Kennedy School; dhe, mbi të gjitha, nga qytetarë e atdhedashës të shumtë të Kosovës, nga çdo kënd i vendit dhe nga diaspora jonë."
Tutje, ai ka shkruar se shërbimin ndaj Kosovës nuk e sheh si çështje pozite, duke lënë të kuptohet se nëse përmendet emri i tij në një situatë të re, është i gatshëm.
"Unë nuk e kam parë asnjëherë shërbimin ndaj Kosovës si çështje të një pozite. Për mua ai ka qenë dhe mbetet mision. Pozitat janë të përkohshme. Përgjegjësia ndaj vendit është shumë më e madhe se çdo pozitë dhe shumë më jetëgjatë se çdo moment politik."
Në fud, kandidatura e përfolur, ai tha se është ofertë për t'i shërbyer Kosovës, duke shtuar se si e tillë akoma qëndron.
