Ish-presidenti Bill Clinton pritet të përballet të premten me pyetje nga anëtarët e Komitetit të Mbikëqyrjes së Dhomës së Përfaqësuesve, i udhëhequr nga republikanët, lidhur me marrëdhëniet e tij me Jeffrey Epstein, duke u bërë presidenti i parë në detyrë ose ish-presidenti që dëshmon para anëtarëve të Kongresit, në më shumë se 40 vjet.
Ai do të merret në pyetje në një seancë me dyer të mbyllura, një ditë pasi komiteti mori në pyetje bashkëshorten e tij, ish-Sekretaren e Shtetit Hillary Clinton, për rreth gjashtë orë lidhur me atë që ajo dinte për Epstein dhe bashkëpunëtoren e tij Ghislaine Maxwell, raporton NBC News , përcjell Reporteri.net.
Kryetari i Komitetit, James Comer, republikan nga Kentucky, tha të enjten se priste që dëshmia e ish-presidentit të zgjaste “edhe më shumë”. Takimi po zhvillohet në Chappaqua, New York, ku familja Clinton ka një shtëpi.
Familja Clinton i tha komitetit në deklarata nën betim muajin e kaluar se nuk kishin “asnjë dijeni personale” për ndonjë “veprimtari kriminale” nga Epstein apo Maxwell.
Hillary Clinton ka deklaruar se nuk i kujtohet të ketë takuar ndonjëherë Epstein, por Bill Clinton ka pranuar se ka udhëtuar me avionin e tij në vitet 2002 dhe 2003, ndërsa po udhëtonte jashtë vendit për Fondacionin Clinton. Në deklaratën e tij, Bill Clinton tha se Epstein “ofroi një avion mjaftueshëm të madh për të akomoduar mua, stafin tim dhe shoqërimin tim nga Shërbimi Sekret i SHBA-së, në mbështetje të vizitave për punën filantropike të Fondacionit.”
Ndërsa Presidenti Donald Trump e ka akuzuar atë se ka bërë dhjetëra udhëtime në ishullin e Epstein në Karaibe, Bill Clinton tha në deklaratën e tij se nuk ka qenë kurrë atje. Shefja e stafit të Shtëpisë së Bardhë, Susie Wiles, tha në një intervistë për Vanity Fair vitin e kaluar se Trump “ishte gabim për këtë.”
