Deputeti i PDK-së, Artan Behrami ka reaguar ashpër ndaj deklaratës së deputetit të VV-së.
Behrami në rrjetin social ‘Facebook’ shkroi se” Deputeti i VV-së e tha vetëm atë që thellë në shpirt e mendon edhe Donika Gërvalla, edhe Albin Kurti!
Me dënimin e krerëve të UÇK-së, ata e shohin shpresën e vazhdimit të okupimit të institucioneve.
Por, së shpejti, ne do të festojmë bashkë me çlirimtarët!
E ju, me kë do te vajtoni?”.
Kujtojmë se Fatos Geci, deputet i Lëvizjes Vetëvendosje, ka kërkuar dënim me burgim të përjetshëm për ish-presidentin Hashim Thaçi, gjatë një fjalimi në Kuvendin e Kosovës.
Geci tha se Thaçin do ta ndjek fati i Naim Murselit, i cili u dënua sot me burgim të përjetshëm.
“Sot, dua të përshëndes vendimin e gjykatës për burgim të përjetshëm ndaj Naim Murseli. Dhe ju që shpresoni se lideri juaj suprem do të lirohet, do ta përcjellë i njëjti fat. Por, edhe nëse lirohet ai nuk ka kurrfarë kredibiliteti përball Albin Kurtit”, deklaroi Geci mes të tjerash.
