Kandidati për kryeministër nga radhët e PDK-së, Bedri Hamza, ka thënë se me të në krye të Qeverisë, Kosova do ta rifillojë Dialogun Strategjik me SHBA-në.
Pos tjerash, ai tha se do të thellohet edhe partneriteti me NATO-n, dhe do të arrihet marrëveshje strategjike me Shtetet e Bashkuara të Amerikës, transmeton Klankosova.tv.
“Do ta modernizojmë infrastrukturën mbrojtëse të vendit që Kosova të jetë e përgatitur për çdo kërcënim, të brendshëm e të jashtëm. Do ta krijojmë Gardën Kombëtare të Kosovës, forcë operative, e shpejtë, e pajisur sipas standardeve të NATO-s. E gatshme për emergjenca, siguri dhe pjesëmarrje në misione ndërkombëtare. Anëtarësimi në NATO e në BE për ne nuk ka alternativë. Prandaj do të thellojmë partneritetin me NATO-n. Do të punojmë që sa më parë të bëhemi pjesë e Partneritetit për Paqe. Do ta rifillojmë Dialogun Strategjik me SHBA, që sa më shpejt të arrijmë te Marrëveshja Strategjike me SHBA. Dhe po, do të punojmë për anëtarësimin në Këshillin e Evropës dhe ta marrim statusin e Kandidatit në BE. Kosova do të ecë drejt Evropës si shtet i pjekur dhe i besueshëm”, ka thënë Hamza.
Kjo ishte shtylla e mbrojtjes dhe sigurisë, e prezantuar si vizioni Bedri Hamzës.
