Avokati kosovar, Besnik Berisha, i cili përfaqëson njërin prej policëve të arrestuar nën dyshimin për veprën “vrasje nga pakujdesia” për rastin e 27 vjeçarit, Agon Zejnullahu, ka thënë se është kërkuar paraburgimi nga Prokuroria, vetëm për shkak se janë raportet e acaruara mes familjes së viktimës dhe policëve të arrestuar.
“Sot u kërkuar masa e paraburgimit për një arsye, për shkak të raporteve të acaruara”, ka thënë Berisha.
Sipas tij, veprimet e Agon Zejnullahut kanë qenë të dhunshme dhe se policët e kanë kryer punën e tyre.
“Veprimet e të ndjerit kanë qenë të dhunshme. I pari që ka telefonuar Policinë është një prokuror. Zyrtarët policor e kanë kryer detyrën e tyre. Ata s’janë kardiolog, s’janë pulmolog. Kemi një situatë në të cilën duhet të flasë mjekësia”, ka thënë Berisha.
Avokati mbrojtës ka pasur kritika për ndihmën mjekësore që i është ofruar nga ndihma e shpejt. Sipas tij, mjekja që del nga autoambulanca, del sikur ta ketë ftuar dikush për kafe.
“Ndihma mjekësore nuk ka qenë e duhura. Dihet që del doktoresha si me e ftu dikush me pi kafe. Nuk provohet ti jepet në vend ndihma. Prandaj nxitoi zonja e nderuar, që t’i fajësojë policinë, para se të flasë mjekësia”, ka thënë Berisha.
