Asnjë vend nuk ka të drejtë të bllokojë Ngushticën e Hormuzit, thotë shefi i OKB-së për Detin

Kreu i organizatës përgjegjëse për sigurinë dhe mbrojtjen e transportit detar global ka thënë se asnjë vend nuk ka të drejtë ligjore për të bllokuar Ngushticën e Hormuzit, ka raportuar BBC.

Arsenio Dominguez, Sekretari i Përgjithshëm i Organizatës Ndërkombëtare Detare (IMO), tha se ndërsa bllokada amerikane “duket të jetë shumë specifike për aksesin në portet iraniane”, ligjërisht nuk kishte bazë për asnjë vend për të bllokuar rrugën ujore.

“Në përputhje me të Drejtën Ndërkombëtare, vendet nuk kanë të drejtë të bllokojnë një ngushticë ndërkombëtare që përdoret për lundrim ndërkombëtar”, u tha ai gazetarëve në një konferencë në selinë e IMO-s në Londër këtë pasdite.

Z. Dominguez tha gjithashtu se edhe pse shumë pak anije po kalonin Ngushticën para bllokadës, “bllokimi” i fundit nga SHBA-të “nuk ofron asnjë zgjidhje për krizën që kemi”.

“20,000 detarë nuk mund të kalojnë tranzit. Ekonomia globale vazhdon të preket dhe se derisa të adresohen shkaqet rrënjësore, të gjithë ne ende vuajmë prej saj”, tha ai.

“Bllokimi shtesë nuk ndihmon në gjetjen e një zgjidhjeje për konfliktin.” Ai shtoi: “Do t’u kërkoja të gjithëve të luanin sipas rregullave.”