Arrestohet një person në Gjakovë, i gjenden mbi 5 kg marihuanë

Policia e Kosovës ka arrestuar një person të dyshuar për posedim të substancave narkotike gjatë një aksioni të zhvilluar më 3 prill 2026 në Gjakovë.

Sipas njoftimit, njësitet nga Drejtoria për Hetimin e Trafikimit me Narkotikë, Drejtoria kundër Krimit të Organizuar dhe ajo e Krimeve të Rënda, gjatë zbatimit të një plani taktik, kanë ndaluar për kontroll një veturë me targa të huaja, e cila drejtohej nga i dyshuari me inicialet A.B. (1978).

Gjatë kontrollit të automjetit, në pjesën e ulëseve të pasme janë gjetur dhe sekuestruar dhjetë paketime të mbushura me substancë të dyshuar narkotike të llojit marihuanë, me peshë totale prej 5 kilogramë e 413 gram.

Po ashtu, si prova materiale janë sekuestruar edhe automjeti si dhe dy telefona mobil që i përkisnin të dyshuarit.

I dyshuari është arrestuar dhe shoqëruar për intervistim, ndërsa me vendim të prokurorit i është caktuar masa e ndalimit për 48 orë.