Arrestohen dy shqiptar në Vjenë, njëri nga Kosova e tjetri nga Shqipëria - U kapën me mbi 100 kg kanabis

Policia austriake ka arrestuar në Vjenë dy persona, një 22-vjeçar me shtetësi të Kosovës dhe një 29-vjeçar me shtetësi të Shqipërisë, nën dyshimin për përfshirje në tregti të paligjshme të narkotikëve.

Operacioni është zhvilluar më 29 shtator, rreth orës 13:00, në distriktin Rudolfsheim-Fünfhaus të Vjenës, raporton Heute.at.

Hetimet janë kryer nga Njësia Speciale për Luftimin e Krimit Rrugor (EGS), e cila kishte mbledhur informacione për aktivitetin e dyshuar të dy personave.

Pas lokalizimit të tyre, zyrtarët policorë i ndaluan në rrugë. Në disa kuti transporti që ata kishin me vete, policia gjeti rreth 16 kilogramë produkte kanabisi, raporton Heute.at.

Kontrollet vazhduan edhe në dy apartamente dhe një hapësirë depozitimi që dyshohej se ishin të lidhura me të dyshuarit. Aty u sekuestruan rreth 88 kilogramë produkte të tjera kanabisi dhe 834 gramë kokainë.

Në total, policia konfiskoi rreth 104 kilogramë produkte kanabisi dhe 834 gramë kokainë, si dhe një shumë parash në euro, vlera e së cilës nuk është bërë e ditur.

Dy të dyshuarit ndodhen në ndalim policor, ndërsa hetimet për rastin po vazhdojnë.

Të dy personat konsiderohen të pafajshëm deri në një vendim përfundimtar të gjykatës.