Armëpushimi SHBA–Iran, ​Kusari-Lila: Pritet stabilizimi i çmimit të naftës

Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila ka deklaruar se beson që stabilizimi i çmimit të naftës do të vazhdojë në ditët në vijim pas arritjes së marrëveshjes për armëpushim mes SHBA dhe Iranit.

Kusari-Lila ka thënë se mekanizimi ekzistues për përcaktimin e çmimeve maksimale të lejuara të derivateve të naftës, nuk do të lejojë të shkohet mbi normën e përcaktuar.

“Uroj që stabilizimi i çmimit të naftës dhe derivateve të vazhdoj ditëve në vijim, dhe kjo do të varet nga rrethanat në Lindjen e Mesme shumë e rëndësishme që ky mekanizëm i joni deri tani ka dhënë rezultatet e veta ndoshta jo në nivel 100% ka pas lëvizje të çmimeve, por gjithsesi që në situatën kur do të kemi qarkullim të lirë në Ngushticën e Hormuzit dhe mos ndikim të sasi apo të çmimit në berzen ndërkombëtare, atëherë edhe në Kosovë do të hiqet mekanizmi i përcaktimit me marzhë.”, ka deklaruar ajo.

Sipas saj, duhet më shumë se sa një ditë që të përcaktohet saktë nëse do të kalohet në një situatë normale.

“Ne kemi e vlerësuar dy herë në ditë marrim informata mbi çmimin e importit të naftës dhe derivateve të saj, prandaj e kemi mekanizmin e marzhës që nuk do të lejoj të shkohet mbi normën e përcaktuar të çmimit të naftës dhe derivateve“, ka thënë ajo.