Ish-ministri i Mbrojtjes, Armend Mehaj, ka bërë thirrje për bashkim dhe koordinim më të madh ndërmjet Kosovës dhe Shqipërisë, pas zhvillimeve të fundit dhe aktgjykimit të djeshëm në Hagë.
Mehaj ka vlerësuar se në momentet kur historia i ka vendosur shqiptarët përballë sfidave të mëdha, ata kanë arritur të fitojnë kur kanë qenë të bashkuar.
Ai ka kërkuar që Prishtina dhe Tirana të ulen sa më shpejt në një tryezë të përbashkët, ku dy qeveritë, së bashku me ekspertë të së drejtës ndërkombëtare, drejtësisë, diplomacisë dhe marrëdhënieve ndërkombëtare, të ndërtojnë një platformë të përbashkët për veprim diplomatik.
Shkrimi:
Kur historia na ka vënë përballë sfidave më të mëdha, kemi fituar atëherë kur kemi qenë të bashkuar. Sot, më shumë se kurrë, historia po na kërkon të jemi bashkë.
Jemi një komb i vogël në numër, por me një histori të madhe dhe me interesa kombëtare që nuk mund të mbrohen përmes përçarjes. Përballë nesh vazhdojnë të veprojnë interesa dhe agjenda që nuk e duan forcimin e Kosovës dhe të shqiptarëve. Përvoja historike, e veçanërisht politika e vazhdueshme e Serbisë ndaj Kosovës dhe shqiptarëve, na obligon të jemi syçelë, të organizuar dhe të vendosur.
Në këto rrethana, Shqipëria politike nuk duhet të ndihet as e qetë dhe as komode. Deklaratat politike janë të nevojshme, por nuk mjaftojnë. Koha kërkon veprim aktiv diplomatik dhe bashkërendim të ngushtë ndërmjet Prishtinës dhe Tiranës.
Realiteti i ri i krijuar pas aktgjykimit të djeshëm kërkon përgjigje të menjëhershme dhe të koordinuar. Prishtina dhe Tirana duhet të ulen pa vonesë në një tryezë të përbashkët. Dy qeveritë, përkatësisht kryeministrat Kurti dhe Rama, së bashku me ekspertë të së drejtës ndërkombëtare, drejtësisë, diplomacisë dhe marrëdhënieve ndërkombëtare, duhet të ndërtojnë një platformë të përbashkët për një veprim diplomatik të koordinuar. Kjo platformë duhet të synojë mbrojtjen e së drejtës së luftës çlirimtare, të së vërtetës historike dhe të së drejtës së popullit të Kosovës për liri dhe vetëvendosje, si dhe të kërkojë që drejtësia ndërkombëtare të zbatohet mbi standarde të barabarta dhe të paanshme.
Sot nuk ka rëndësi kush është President i Kosovës. Institucionet dhe funksionet ndryshojnë, por interesi i shtetit dhe i kombit mbetet. Ajo që ka rëndësi është pozita e Kosovës në arenën ndërkombëtare dhe aftësia jonë për të vepruar me një zë, me koordinim institucional dhe me një strategji të qartë.
