Anita reagon pas dorëheqjes së Ramushit: Ti je një lider dhe strateg që në komb lind një herë në 100 vjet

Dorëheqja e Ramush Haradinajt nga pozita e kryetarit të Aleancës për Ardhmërinë e Kosovës ka tërhequr vëmendjen e madhe të publikut dhe ka nxitur reagime të shumta.

Pas këtij zhvillimi, një reagim emocional ka ardhur nga bashkëshortja e tij, Anita Muçaj-Haradinaj, e cila përmes rrjeteve sociale ka shprehur mbështetjen e saj të pakursyer.

Në postimin e saj, Anita ka theksuar se për të, roli më i rëndësishëm mbetet të jetë bashkëshortja e Ramushit dhe nëna e tre fëmijëve të tyre. Ajo ka shkruar: “Nuk ka titull më të bukur se të jem gruaja jote”, duke vlerësuar gjithashtu aftësitë e tij si udhëheqës: “Ti je një lider dhe strateg që në komb lind një herë në 100 vjet”.

Ajo ka përmendur rrugëtimin e përbashkët gjatë viteve, duke theksuar se kanë kaluar shumë sfida dhe etapa së bashku, por se tani po hapet një kapitull i ri për ta si familje.

Postimi e mbyll me një mesazh të ngrohtë për lidhjen e tyre dhe gëzimin për kohën që do ta kalojnë më pranë njëri-tjetrit: “Kosova të do, por unë të dua edhe më shumë. Më në fund e fitova burrin tim”.