Ambasadori i Mbretërisë së Bashkuar në Kosovë, Jonathan Hargreaves, u ka bërë thirrje forcave politike në vend që të bashkëpunojnë për funksionalizimin e institucioneve dhe vazhdimin e reformave demokratike, duke theksuar se sfidat me të cilat përballet Kosova nuk mund të presin më.
Duke folur në pritjen solemne të organizuar nga Ambasada britanike me rastin e ditëlindjes zyrtare të Mbretit Charles III, Hargreaves tha se partitë politike duhet të vendosin interesin e shtetit mbi dallimet partiake dhe të punojnë së bashku për krijimin e një parlamenti të qëndrueshëm, një qeverie funksionale dhe një presidencë efektive, raporton KosovaPress.
“Pas 18 muajsh pasigurie, besoj se të gjithë këtu pajtohen se partitë politike duhet të punojnë së bashku për të mirën e Kosovës për të krijuar sa më shpejt një parlament të qëndrueshëm, një qeveri funksionale dhe një presidencë. Ka shumë punë për të bërë për të vazhduar ndërtimin e një shteti ku të gjitha komunitetet dëshirojnë të jetojnë dhe të ndihen pjesë e tij, për të ruajtur institucione që gëzojnë besim për pavarësinë dhe integritetin e tyre dhe për të kultivuar një kulturë ku kompromisi politik të shihet jo si dobësi apo lëshim, por si guxim dhe detyrë në shërbim të këtij vendi të mrekullueshëm. Kosova nuk duhet të dyshojë kurrë në mbështetjen e Mbretërisë së Bashkuar”, tha ai.
Ai veçoi rëndësinë e besimit që Kosova duhet të frymëzojë tek partnerët ndërkombëtarë, duke theksuar se vendi duhet të dëshmojë se është një aleat i besueshëm, që mban premtimet dhe vlerat mbi të cilat është ndërtuar.
